កីឡា២ប្រភេទដែលឡាវបញ្ជូនមកចូលរួមប្រកួតក្នុងបុណ្យទន្លេនៅស្ទឹងត្រែង

ចាប់តាំងពីឆ្នាំពី ២០១៥ មកប្រទេសកម្ពុជាបានប្រារពបុណ្យទន្លេ ដែលលើកទី១ ប្រារពនៅខេត្តកំពង់ចាម លើកទី២ នៅខេត្តក្រចេះ ហើយពិធីបុណ្យទន្លេលើកទី៣ នេះបានប្រារព្ធធ្វើឡើងឯខេត្តស្ទឹងត្រែង ចាប់ផ្ដើមតាំងពីព្រឹកថ្ងៃទី២៤ ខែមីនា ឆ្នាំ២០១៧នេះ មាន១១ប្រភេទកីឡាដាក់ចូលឲ្យចូលរួមប្រកួតប្រជែង និងរឹតតែពិសេសទៀតនោះក៏មានការចូលរួមពីកីឡាករឡាវទៀតផងលើពីរប្រភេទកីឡា។

ឯកឧត្ដម វ៉ាត់ ចំរើន កំពុងផ្ដល់បទសម្ភាសន៍

ឯកឧត្ដម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកបានឲ្យដឹងកាលពីព្រឹកថ្ងៃទី២៤ ខែមីនា ឆ្នាំ២០១៧ ថា ពិធីបុណ្យទន្លេលើកទី៣នេះគឺមានការចូលរួមប្រកួតប្រជែងពីសំណាក់ប្រជាជនឡាវដើម្បីអបអរពិធីនេះដែរ។

ចំពោះកីឡាករឡាវដែលបានចូលរួមនេះ ពួកគេប្រកួតលើប្រភេទកីឡាបាល់ទះ និងបាល់ទាត់។ ក្រុមបាល់ទាត់និងបាល់ទះ របស់ឡាវនឹងត្រូវប្រកួតប្រជែងជាមួយក្រុមបាល់ទាត់ និងបាល់ទះមហាជននិងក្រុមកីឡារបស់មន្ទីរអប់រំយុវជននិងកីឡាខេត្តស្ទឹងត្រែង ៣ក្រុមទៀត។ ចំពោះការប្រកួតទៀតសោតធ្វើឡើងរយៈពេល៣ថ្ងៃ គឺពីចាប់ផ្ដើមពីថ្ងៃទី២៤-២៦ ត្រូវនឹងថ្ងៃបញ្ចប់តែម្ដង។ នាថ្ងៃទី១នៃពិធីវិធីបុណ្យទន្លេនេះ មានប្រភេទកីឡាមួយចំនួនបានចាប់ផ្ដើមប្រកួតដូចជា រត់ប្រណាំង ទាញព្រ័ត្រ វាយសី និងបាល់ទះផងដែរ។ ប្រភេទកីឡាផ្សេងទៀតចាប់ផ្ដើមប្រកួតនៅថ្ងៃស្អែកជាបន្តទៀត៕