ការហិតផោមអាចជួយការពារជម្ងឺមហារីក

អ្នកវិទ្យាសាស្ត្រនៅមហាវិទ្យាល័យ Exeter ចក្រភពអង់គ្លេសឱ្យដឹងពីលទ្ធផលស្រាវជ្រាវថា «ផោម» អាចការពារជំងឺមហារីក ផ្សេងៗបាន។លោកសាស្ត្រាចារ្យ ម៉ាក វូដ បានបង្ហាញលទ្ធផលសិក្សាស្រាវជ្រាវរបស់ខ្លួនថា ឧស្ម័នអ៊ីដ្រូហ្សែន សាល់ហ្វាយ (Hydrogen Sulfide) ឬ «ផោម» ដែលកើតចេញពីការរំលាយអាហាររបស់បាក់តេរី និងមានក្លិនស្អុយជាវត្ថុដែលផលិតឡើងពីធម្មជាតិក្នុងខ្លួនរបស់មនុស្ស អាចជាកូនសោសំខាន់ដោះស្រាយបញ្ហាសុខភាពឆ្ពោះទៅរកការព្យាបាលជំងឺជាច្រើនប្រភេទ ។

ទោះបីជាការស្រូបយកឧស្ម័នស្អុយនេះក្នុងបរិមាណច្រើនអាចបង្កជាតិពុល ប៉ុន្តែអ្នកស្រាវជ្រាវបែរជាមានជំនឿចិត្តថា ក្លិនផោមដែលភាយចូលច្រមុះអាចជួយកាត់បន្ថយការប្រឈមមុខនឹងការកើតមហារីក ជំងឺសរសៃឈាមស្ពៀតក្នុងខួរក្បាល ជំងឺបេះដូង និងជំងឺសន្លាក់ដៃជើង ជាដើម ។

លទ្ធផលសិក្សាស្រាវជ្រាវនេះបានផ្សព្វផ្សាយនៅក្នុងឯកសារវេជ្ជសាស្ត្រ Medicinal Chemistry Communications ។ ប្រសិនបើផោមមានប្រសិទ្ធភាពការពារជំងឺបានមែន គួរតែអរគុណដល់អ្នកផោមញឹកនៅកន្លែងធ្វើការ ឬនៅតាមជណ្តើរយន្តជាដើម ៕